Un artigo de El Progreso / Marina Delgado

A Asociación Profesional de Obradoiros Artesáns da Mariña, presentada este xoves oficialmente en Foz, aglutina o 50% dos artesáns da comarca e nace para impulsar a cooperación e o fortalecemento do sector artesán na zona promovendo a súa viabilidade económica, a formación e a innovación.

A profesionalización do sector, a través desta asociación, contribuirá, segundo explicaron na presentación, «a impulsar a promoción e comercialización da artesanía desde o respecto pola tradición e a autenticidade, baixo principios de vinculación co territorio, sostibilidade, ética profesional e contribución ao turismo cultural do xeodestino».

O proceso de posta en marcha do novo colectivo iniciouse en 2011 coa creación dun rexistro de artesáns co obxectivo de situar este sector como un atractivo turístico na zona e desde o principio contou co apoio da Mancomunidade de Concellos da Mariña Lucense. Desde ese momento a Mancomunidade empezou a desenvolver proxectos para facer da artesanía «unha experiencia viva, auténtica e conectada co territorio», explican os seus responsables, e o proxecto foi evolucionando ata converterse nun produto turístico estruturado e sostible.

Na actualidade a aposta segue a ser a mesma ao abeiro do proxecto A Mariña Artesá, baixo o cal o ente comarcal segue «avanzando e apostando por un modelo turístico sostible, baseado na identidade local, na calidade e na participación», explicou a presidenta Rocío López. «Un modelo que non só atrae visitantes, senón que fortalece o noso tecido produtivo, dignifica o traballo artesanal e reforza o orgullo de pertenza».

López agradeceu a colaboración da Xunta e da Deputación coa Mancomunidade e felicitou aos artesáns porque «esta iniciativa demostra compromiso, visión de futuro e vontade de traballar de maneira conxunta no fortalecemento do sector». «Sen dúbida será unha ferramenta clave para seguir avanzando na defensa, promoción e dignificación da nosa artesanía».

No transcurso do acto, o presidente do colectivo, Marcelo Scapinachis, apostou por seguir sumando esforzos e proxectos entre todos e animou aos artesáns da comarca a unirse a este proxecto.

Tamén acudiron á presentación o alcalde focense e deputado da área de Recursos Sostibles, Fran Cajoto, que destacou que o novo colectivo simboliza «unión, compromiso e unha maneira intelixente de mirar cara ao futuro», así como a xefa de área provincial de Turismo, Paloma Vázquez. Tamén estivo o deputado Daniel García, que destacou «a importancia de ferramentas colectivas como esta asociación para articular iniciativas de apoio ao sector» e ofreceu a colaboración e experiencia do Centro de Artesanía e Deseño para contribuír aos obxectivos do novo colectivo.